.jpg)
"ART WEEK 2023 Ulaanbaatar" орчин үеийн дүрслэх урлагийн үзэсгэлэн нээлтээ хийлээ.
Монгол Улсын Соёлын Яам, Монголын Урчуудын Эвлэлийн Хороо хамтран зохион байгуулж буй Улаанбаатар Арт Вийк “Дүрслэх урлагийн долоо хоног” нээлтээ хийлээ.
Гурав дахь удаагаа зохиогдож байгаа тус арга хэмжээнд нийт 150 гаруй бүтээлчээс өнөө цагийн монголын дүрслэх урлагийн өнгө төрхийг тодорхойлж яваа бүтээлчдийн үе үеийн төлөөлөл гэж болохуйц 42 бүтээлчийн ажил сонгогдсон бөгөөд эл үзэсгэлэнд Венецийн бенналь, Документа, Бээжин бенналь, Норд Арт, Кванжу бенналь зэрэг энэ цагийн орчин цагийн дүрслэх урлагийн ертөнцөд дээгүүр эрэмбэлэгддэг, нэр хүндтэй наадмуудад уригдаж, сонгогдож оролцон байр эзэлсэн эсвэл эх орныхоо орчин үеийн урлагийг сурталчилсан бүтээлчдийг урьж Монголынхоо үзэгчдэд давхар таниулах зорилготой билээ.
Мөн орон зайн, үйл хөдлөлийн, видео арт, ассембляж, интерактив зэрэг шинэ медиа, холимог ажлуудаас гадна тосон будгийн уран зураг, зураасан зураг зэрэг уламжлалт арга, хэлбэрүүдийг ч хамарч, багтаасан нь өмнөх жилийн үзэсгэлэнгүүдээс ялгарах онцлогтой. Өөрөөр хэлбэл уламжлалт медиа ашиглан хийсэн шинэ агуулга, контемпорари санааг үзэгчдэд давхар харуулахыг зорьжээ.
Арт вийк үзэсгэлэн нь голдуу зураач, бүтээлчдийн цөөхөн хүрээлэлд л мэдэгдээд өнгөрдөг байсан монголын орчин цагийн дүрслэх урлаг дахь сонирхолтой, шинэ, өвөрмөц хандагуудыг нийтэд, тэр дундаа шинэ залуу үеийнхэнд үзүүлэх танин мэдэхүйн ач холбогдолтойн дээр энэ төрлийн арга хэмжээнүүд нь төрөлх хотоо урлагаар дамжуулан гадна дотныхонд сурталчилах, урлаг бизнессийн харилцаа сайжруулах, соёлын аялал жуулчлалын нэг хэлбэр болон өргөжих ч өргөн боломжтой том ажил, агуулгын эхлэл билээ.
Арт вийк 2023 үзэсгэлэнгийн ерөнхий куратороор уран бүтээлч Б.Бат-Эрдэнэ, Б.Баатарзориг нар сонгогдон ажиллаж байна. Өмнөх жилийн үзэсгэлэн болсон орон зайд дахин болж байгаа тул үзэсгэлэнгийн нийт харагдац, уур амьсгал зэргийг ялгаатай байлгахаар кураторын багийнхан төлөвлөн ажиллажээ.
Үзэсгэлэн нь 5-р сарын 24-өөс 31-ний хооронд Хүнс, хөдөө аж ахуй, хөнгөн үйлдвэрийн судалгаа хөгжлийн төвд зохион байгуулагдаж байна.
МУЭ
